Titir tatau Merajaq Intatn nyaoq Ayaakng Miwir Kuning, olaq baritun tautn juaq ngerangan
datai, neau Miwir Kuning ngonaq butukng untukng, nganuk anak mua ulutn, ete 1 bln 2 bulatn sukar
mentoluq bulatn, turas mentopat bulatn, sukar 5 6 bulatn, mempeq me 8 bulatn sukar mence 9 bulatn pede,
tokai miwir kuning ngutok merajaq intatn dingaq ko merajaq intatn ituq arep butukng
nareq kakatn lolos kakatn mekus, merajaq intatn ngekajat simpakng buat, jurokng
nontokng alatn kereramaq alaq, nontokng edos pemelolos nontokng pujut penguyut, kekat uat ojat malaatn, ngencalokng
olakng lou, ngeramaq liakng gantukng, sorokng nontokng boa jawakng, dolui tukar
dusutn solai botuk natar surat bulau, kedot jurook dekaq tunaau, alatn doeh
nangkalewekng, balont bintakng tapik enus, nete alatn pemantulatn bekat wakat
pitai tajak, alaatn dopeq dekeakng, walakng potaatn beau kait, pemencaraatn
pune mpe pulutn lio nyawi iro, nyawi encangan 8, batuk natar surat bulaw,
nyituk lou naan paliiq, ketingep naan engan aweq pengambaliq lou, liakng
gantukng aweq liatn, kedep lelipatn mengket, mengket tukar dusutn solai,
tenukng ketetalaq lewai, munan ketetalaq lewai, telegatn loutn jautn, pelengko
pagar tunyukng, nyelapm olakng lou lamakng,lotop amin lamak limuq, neau edos
pemelolos eso ngonaq nunuk nuat, male ngonaq pantukng nurui, tokaq merajaq
intatn, ap arep jurokng nontokng, nontokng ko pujut penguyut nontkng edos pemelolos,
alatn sencalokng nontokng alatn kereramaaq alaaq, aro miwir kuning kakatn lolos
kakatn mekus. Muatn untatn berantoi, siap bulau kelalemo, lemo kukup unuk,
rekajat simpakng buat, telahui puai malatn, sencalokng olakng lou, kereramaq
liakng gantukng, nontokng pento waetn nawang pelengkau pagar tunyukng, ngerkidik
bange tana, mokas lengkas nobekng kenekng. Nanyuq kukuq seribuq nguntai kiayai
ribuq sinai, on kolatn puai malatn puti riniq bawi ngampir, nyawi natar surat
bulau, mpeq lou nyawi kutaq, mengket lou nangkaq kutaq, untkng kaso tenukng mo
munan ketatalaq lewai, pelngkau pagar tunyukng nyelapm olakng lou lamakng,
lotop amin lamak limuq, engket telengkotn tiokng, lotop kalemuq ngantukng,
jadiq pujut tahui nguyut, edoh i pelolos, keserau danum waaw kesoaar angih
niam, motak pusokng nota ngasaai, nyaut nokai nai, epuq otus junyukng ayus,
epuq tokai ineq lintai, rempak anyakng araatn iro. Tatau merajaq intatn okoi
lalus okai trmai okoi kahikng okoi kikih, serah serahatn tinak edos pemelolos
tika pujut penguyut. Nadeq ka rima nengkalo ka lamaq nelangkap. Pemerncaratn
pujut edos pemelolos tahui dencooi tenelonyooq uli sancangan 8, (edos pemelolos
pujut penguyut nenek kemah nenek kewah).
Pemernacartn merajaq intatn ampetn miwir kuning memea
memoyaq. Jadiq merajaq intatn manan beruku seniang simur, ngeliatn anak bawi, seniang
simur ngeliatn anak titukng. Tokai merajaq intatn sake anak titukng, nyimai
ampetn anak bawi. Merajaq intatn nyeq la Mukng anak titukng, siu molupm.
Ulutn ngonaq gilikng uli, sengkuur
pusok kalaq anyoor pelilir, lalo moit
mintatn sunge solokng, laitn urek jatek, moit mintatn olakng toyop, doit uli la
lou. Ngencak kalaq anyor pelilir miwir kuning. Rempak ayakng tekulu balik
toikng, tauq komot sencolaar, uat olakng
lou, gelukng, tauq wat tauq jakaaq, kakatn tauq malaatn, tiank ngeno susur
alaau. Neau rempak ayakng tauq malat olakng laou,tekoruq tauq malatn nyentura
bange tana. Uhaq ngonaq sungkai solai, simpakng lolakng, solai nyang olo
malapm. Teteq solai nempetn dadaaq, siwo upo simpang lolakng, puq ngonaq lomuq
tauq puti jaji, manan ngeloh nusaq lou layatn. Teneau sookng niam, kemahaq
rempak ayang, ngonaq simpakng lolakng, rempak aakng muat egah, tauq kudi unuk
bokaakng, tauq nempaq boyas bura tauq masi danum lio, tauq motak dawarn tamang,
tokai miwir uning, ko rempak ayaqng ngua umaq tautn, alatn ngua umaq tautn,
nontokng pusok dodok jabau jabukng. Tarukng bawe rempak ayakng ngonaq bungaq
buatn, uhaq ngonte komakng lolakng, jadiq bungaq lepok pusook, deningan lou
jaa, dingan upo sookng deningan ayakng niam. Taruk nusuk luakng we, nyelumaq
runtiq bulau, tarukng nusuk luakng wakai, nyelumaq luluk bawo. Tarukng iro murek dayoq, murek witu rangaq
karukng, deningaan mantitn bayaatn, dingan kilip taman tauq olo bayuh bulatn
lalapm, mo jampatn tuayatn, dingan tatau timang bulow, patih gagah olakng
wangan, dingan ulutn mengengautn utak witu, meretingang kuakng bonakng, taruk
ayakng naping sawaq, turas siluq laut danum, dingan julukng umaq mangoi beliatn
tingkatn tasik jerungan jauq jalakng, tarukng iro tempuk mo, tenukng puncutn
jaa 100, barukng nancakng ribuq sinaai, dingaan tatau damukng itukng, dingan
tatau damukng aduh, tokai ulutn, kebuatn tarukng bawe rempak ayakng. Tarukng
iro ili waq dingan ulutn nancakng balai tana, turas mpeq jaa papatn puti dingan
rimukng lomun mukatn, lalukng sumpikng pamangkeriq, taruk iro napikng sawaaq
dingan tatAu Radetn tamutn. Tokai tatau radetn tamutn buatn tarukng rempak
ayakng. Tokai taatu radetn tamunt ap naan lani deniratn, kakaatn nyaooq niam
iro. Uhaq nyiap manciq lumah ulap sape, pupuh nyui serampakng lisat, pita naq
ap ngantar pupuh nyui serampakng lisat al dayoq. Pemencaraatn pune mpe nyawi
lou nyawi jaa, nyituk lou nan jarik liakng gantukng naan liatn, ketingep nan
engan aweq penempalitn lou liakng gantukng aweq liatn. En gket tukar dusutn
solai, munan ketetalaq lewai, pelengkau pagar tunyukng, nyelapm olakng lou
lamak, nontokng apai solukng berakng. Lusiq biwiq kediq2 bila boa jamat2, usik
alatn dabai. Ulutn nogeq man, rekajat simpakng buat lotop amin lamak limuq,
nuat ruratn bukutn okaatn, nangkap danum bui kami, tuat man dudutn nyongar.
Neau rempak rempaqk ayakng ngatur okaatn. Man epuq botikng, dekeakng tengkau
man nakap danum bui kami, tahui isap solo gerokng, ngerjakat tahui wat, jue
losek sila bawo, uli wat ide lai. Tatau radetn tamutn matak taruk pmaratita, beau
nyilak duiq igtau dawatn, ngantar pupuh nyui serampakng lisat. Ap kakaatn batuq
nonoq, jadiq ohoq penyake jue pengawo apetn bawo, tinak no rempak ayakng. Tokai
tatau radetn tamutn pita naq ap uli la tasik ulak perahuq.
Rempak ayakng denalaq Bintakng sisi,ulutn
sempulak lou. Tokai miwir kuning 2 rempak ayakng beau adaq ngapa, ohoq
pupuq nyui seremapak lisat peneloli. Tokai merajaq intatn , takaq enaq awitn
uli gawai 100. Stelah ruyaq peneloli genisiq awitn gawai 100, denencooi
tenelonyooq la tatau radetn Tamutn. Tokai Radetn tamutn beau bulau mengapaq lingkikng
balakng makaq ootn, Neau tatau radetn Tamutn waetn remang nangkup langit, waetn
busatn benarapm.
Uhaq ncoi siliq solo la piatn deroq,
bereruku elap, deroq ili la piatn tahui tetajak siliq solo. Konaq ongan
bintakng sisi. Deroq uli nus masui, enaq okatn enaq kanan, nahiq okatn puq ncak
nogeq maan nogeq nyongar. Epuq ngonaq butukng botikng asakng buatn sdengat
lehooi, boting nyengkau matukng korau, boting nenekng laiq kenekng, uli wat
ideh lai uli akat ideh lai, naan engan naan iyo, naan subatn seritaq, kaitn 2
bange nus alatn bereruku elap ampetn tatau Radetn Tamutn. Bua mua senentitir
waniq mpat senengkulek, jadiq royow mataq kakatn turi, ngerekajat simpakng buat
ulit lokutn perurui, puq ngonaq lentakng malapm puq ngonaq pentutn turui, kutok
tstau bintakng sisi, ngutok bawe rempak ayakng, tokai no ituq arep marengin
bokakng, arep marengin buluq, jadiq ngerejakat rempakng yakng simpakng buat,
sencalokng olakng lou , ngereramaq liakng gantukng, nontokng jakat
pengejangkokngn, nontokng liatn bawemuan ngemuraq, ngejakat ngenajngkng mua
muraq. Neau eso uhaq sencato olo uhatn kiaq setnakaq nahaaq. Makaq tokai rempak
ayakng awq pikir aweq pintar, pepuluq beau buluq seluakng beau anak, tapiq
tokai miwir kuning eso takaq nengkaah alatn kawo, petitih danum tu dcanan, latn
belakng mamelo alatn lalukng ngelangkining. Bogai badek elo unek, bogai wase
alaaq pare, bogai odak alaq piak, bayuq teraq nan pikir nan pintaar. Baukng
baluq rinuk loyuk, engkokng pitakng rinuk liakng, nyengkai seiq nguntai lawai
suakng sidai solai, negkasuq nikuq jauq suakng buyukng pekalukng.
Epuq engan bulat pahat genelakat,
bulat pebulutn tetukng, roncikng pebulutn angkih, terap perirau belakng, bulat
pebua tolui jotukng loyaakng lio lining, jaut tokai erai uraai, eraai pekat
erai baat, makaq tokai miwir kuning ampetn rempak ayatn nontokng japaq pelulaq,
nontong longet beliatn manget, nontokng janyatn beliatn, sakng atakng olo iro.
La usuk ruakng dayoq, 1 matakng luakng olo, senculakng olo doyakng leputukng
malik malapm, deroq uli deroq unur oit janyatn beliatn, longet beliatn mangbet,
ampetn ruyaq pengeramuq, ampetn gunik jejakaq. Pune mpeq nyawi lou nyawi jaa,
mengket lou nangkaq kutaq, munan ketatalaq lewai, pelengkau pagar tunyukng,
nyelapm olakng lou lamakng, jadiq janyatn beliaatn nuat apaai solukng berakng
nuat idai solukng sapuq. Deroq ruku menyerengkakng sorokng empaq bemutikng
wase, roko benusok bematn, nyiot nyema ngutaq roikng, ketegau nogeq maan te amin lamak limuq,
kekaatn uat berbayat, malatn menyalingkui lotop amin lamak limuq, nuat rutatn
bukutn okaatn, payak pangtai rempak itak, nakap danum bui kami gtahui man
gtahui nyongar, erai dosekng nyalantuakng ncak empaaq enakng walaq, oon kolatn
mpit man pulutn tautn maka5n butukng,
botikng nenekng laiq kenekng, botikng nyengkakng matukng koraw, nakap danum
isap solo gerokng, telahui gilikng uli kaat ulat berebayaq, jue losek sila
bawo, uli wsat kait ide. Pemencaratn rempak ayakng, nentakng julakng
penyempayatn nuat sipukng sreniup, netak ngerarak bias, suakng manciq jaliq
toan kediq, lumah rajaq ijauw, wirikng duduk kedadukatn, bulau kelalemo, kuikng
buatn bantikng, tempayakng buatn amaaq, batak bungaq pengasiw, irikng tidu
kayutn tawar, batak busaatn penyilu. Nguntatn bulau kelalemo, liatn mempakng
liatn mulu, liatn nyapaq liatn nyawai, liatn nyiliq liaatn nyolo, nempuliq liau
mate, adeq kuli penengkunur, liatn muat liatn mangun, wakat jawat jawanan wakaq
juruq jeruhatn, rima tenengkalo, lamaq tenalangkap, antai tokaaq antai leheq,
monak antai rine, mengkeaq saatn etaq mengkaletn saatn opaau. Jadiq intotn
neladatn nempuutn nempuncaatn, nyentitir olo bayuh nyengkulek bulatn lalapm,
pentutn turui nan tupiq naan irap, bayaq pentutn n turui denampat tuhaq watn
bunga jamuq kukut sogou jawakng lopo. Naan tupiq naan irap, pede dongaq
bintakng sisi. Ka muat pantiq lamakng olakng, muat sebatn balai amas, muat
tangkikng mewekng bulau, muat usuk bukur bulau, butun amas butun pirak, pengencatn
tongau bulau, waq tangkikng mewekng bulau, antai semaH nyemohoon, toos bulau juus 8, ekai unek
belakng ali, mpeq nutu siwo louq, beremauq muntetn kuluq, aro ka rima nengkalo
kare lamaq nelangkap, beliatn jakat jangkookng, mangir tahui ngunakng, deroq
semah nyemohoon, deroq junykng nyewaliq, deroq puq ekas uneq belaqkng ali, rima piak jagoq jawaq. Ngarau ngawang bulau
juus, bualau juus bintakng sisi. Liatn tangaai beratamui, laitn kuli penakunur,
pekuli siliq solo, kumak kalaau radetn tamutn. Beliatn sudak solukng nyokooi
lalus nyokoi temai, kahikng, okoi kikit. Liatn uli penekunur.
Neau dongon bintakng sisi mengkeaq rotatn
etau mengkale saatn opau, mengkuas kuas megnkuse mengkuntih mengkolih, kotitn
danum loli olo, kotin dempak bila malapm osoot beraonos, ratu beratekatn. OOtn
iro bintakng sisi, makaq iro mali uputn talitn uputn tingkaq alaq ukur bintakng
Sisi, ukur buatn tuha kenaq, saatn tokaq saatn leheq. (ditutus
penulis dari narasumber/penutus: Muleekng )
Tidak ada komentar:
Posting Komentar